Бүгүн «Саха» НКИХ «Чохоон» саха тылынан тахсар оҕолорго аналлаах ханаалыгар биир дойдулаахпыт улууспутугар биллэр ойуулук оҥорооччу Анатолий Афанасьев «Чысхаан аптаах үтүлүгэ» диэн ойуулуга күн сирин көрдө.
Кини аан бастаан 2021 сылга «Саргы түһүлгэтэ» култуура киинигэр үлэлии сылдьан ойуулук оҥорон саҕалаабыт. Кириэстээх И.Г.Спиридонов аатынан политехническай орто оскуолатыгар «Анимация» куруһуок салайааччытынан сылдьан оҕолору уһуйбут. Былырыын күһүҥҥүттэн улуустааҕы үөрэҕирии управлениетыгар иитии уонна эбии үөрэхтээһин салаатыгар сүрүн исписэлииһинэн үлэлии-хамсыы сылдьар.
«Олунньуга төрөөбүт төрүт тыл уонна сурук-бичик күнүгэр анаан ыытыллыбыт улуустааҕы «ОйууLOOK» анимационнай киинэ көрүү-күрэһигэр уолбунаан Кирилл Николаевтыын «Кэҕэ» диэн ненец омук биллэр остуоруйатыгар олоҕурбут ойуулугунан кыттан гран-при буолбуппут. Ол кэннэ «Саха» НКИХ «ойуулук сакаастаары гынабыт» диэн биллибиттэрэ. Хас да кылгас остуоруйа ыыппыттара, олортон биирдэстэрин талан сэттэ мүнүүтэлээх сценарий оҥорон таһаарбытым. Ырыалаах буолуохтаах диэн ирдэбиллээх этэ. Онно Бүөккэ Бөтүрүөп көмөлөспүтэ. Ырыатын биир дойдулаахпыт Сунтаардааҕы ОДЬКХ кылаабынай инженерэ Степан Егоров толорбута. Ойуулук барыта түөрт ый оҥоһуллан таҕыста. Сунтаардааҕы IT-киин салайааччыта Петр Николаев дьиэ кэргэннэрбит уонна үөрэнээччим Самаана Намылова күүс- көмө буолбуттара», — диэн Анатолий сэһэргээтэ.
Ойуулук ис хоһооно кылгастык маннык. Чысхаан сорук-боллура Тураах обургу, ойуурга тойонун аптаах үтүлүгүн сүтэрэн кэбиһэр. Кыһыҥҥы ойуурга Тииҥчээн барахсан дьикти «хороону» булан тымныы тыалтан саһар. Ону билэн, ойуур олохтоохторо, бары онно иттиэхтэрин баҕараллар…
Билигин Анатолий «Тураах хара дьүһүннэммитэ» диэн иккис ойуулугун оҥорон саҕалаабыт. Ону тэҥэ, кини анимация оҥорор өҥөтүн туһаныахха сөп эбит.
Сахалыы ойуулугу оҕолоргутунаан, дьиэ кэргэҥҥитинэн көрөн төрөөбүт тылгытын иҥэринэн бириэмэҕитин туһалаахтык атаарыҥ!
Алена ИВАНОВА