Ыам ыйын 27 күнүгэр бүтүн Арассыыйа үрдүнэн бэлиэтэнэр Бибилэтиэкэ күнүн чэрчитинэн, бүгүн, ыам ыйын 29 күнүгэр, Сунтаар улууһун бибилэтиэкэлэрин үлэһиттэрэ айылҕаҕа тахсан үөрүүлээх күнү бэлиэтээтилэр. Бу күҥҥэ бибилэтиэкэ бэтэрээннэрин чиэстээтилэр уонна улуус бибилэтиэкэлэрин бастыҥ үлэһиттэрин наҕараадалаатылар. СӨ култууратын үтүөлээх үлэһитэ, ССРС култууратын туйгуна, Сунтаар улууһун Бочуоттаах гражданина, бибилэтиэкэ эйгэтигэр өр сылларга ситиһиилээхтик үлэлээбит, култуура бэтэрээнэ Розалия Степанова аатынан анал бириэмийэ туттардылар. Бу бириэмийэ иккис сылын бибилэтиэкэ бастыҥ үлэһиттэригэр туттарыллар.
Ол курдук быйыл Розалия Николаевна аатынан бириэмийэни икки киһи ылла – Л.А Попов аатынан Сунтаардааҕы киин бибилэтиэкэ үлэһитэ Раиса Павлова уонна Т.С Кириллин аатынан Кутана нэһилиэгин модельнай бибилэтиэкэтиттэн Зоя Кириллина. Бириэмийэни Розалия Степанова төрөппүт уола, Сунтаардааҕы оҕо искусствотын оскуолатын дириэктэрэ Алексей Степанов туттарда.
Дмитрий ЫМЫЧАНОВ