Бүгүн, ахсынньы 14 күнүгэр, Сунтаардааҕы технологическай колледжка ааспыт сылларга үөрэнэн идэ ылбыт, билигин анал байыаннай дьайыыга кыттыылаах выпускниктарыгар аналлаах стендэ туруордулар.
Стендэҕэ сүрүн миэстэни Арассыыйа Дьоруойдара Филипп Евсеев уонна биһиги ортобутугар суох, байыаннай дьайыы буола турар сиригэр хорсун быһыыны көрдөрбүт, сырдык тыына быстыбыт Дмитрий Егоров ылаллар. Кинилэр бу орто үөрэх кыһатыгар идэ ылан тахсыбыттара. Стендэ аһыллыытыгар Дьоруой Егоров кэргэнэ уонна оҕолоро кэлэн ыалдьыттаатылар.
Улуус, нэһилиэк баһылыктара Анатолий Григорьев, Эдуард Филиппов уонна улуус байыаннай комиссара Игорь Данилов дойдуларыгар бэриниилээх уолаттарбыт тустарынан иһирэх ахтыы оҥордулар, устудьуоннарга патриоттуу санааны иитии суолтатын сырдаттылар.
Колледж дириэктэрэ Гаврил Михайлов бэйэтин этиитигэр: «Биһиги колледжпыт курдук икки Дьоруой үөрэммит үөрэх кыһата өрөспүүбүлүкэҕэ, бэл Арассыыйаҕа суох буолуохтаах», — диэн киэн тутта иһитиннэрдэ.
«Колледжпытыгар дойдуларыгар бэриниилээх уолаттарбытыгар анаммыт стендэни харыстыы сылдьыахпыт. Кинилэр хорсун быһыыларынан киэн туттабыт, биир дойдулаахтарбыт этэҥҥэ эргиллэн кэлэллэрин күүтэбит», — диэн устудьуоннар этэллэр.
Дмитрий ЫМЫЧАНОВ